"Ортамыздан ерте кетті": Тоқаев журналистер үйіне Бейсен Құранбектің атын беру туралы бастаманы қолдады

Опубликовано:

Бейсен Құранбек, журналист
Бейсен Құранбек. Фото: zharar.com

Қасым-Жомарт Тоқаев Талдықорғандағы журналистер үйіне Бейсен Құранбектің атын беру туралы бастаманы қолдады. Бұл туралы Ақорданың ресми Telegram арнасы хабарлады.

Бұл туралы мемлекет басшысы Жетісу облысына барған іссапарында айтты.

"Жетісудан шыққан азаматтар тәуелсіздік кезеңінде елімізді дамытуға зор үлес қосты. Соның ішінде белгілі журналист, қоғам қайраткері Бейсен Құранбекті баршаңыз жақсы білесіздер. Оның әзірлеген хабарлары көрерменнің ыстық ықыласына бөленді.

Бейсен Құранбек "Жетісу" телеарнасында біраз жыл табысты қызмет атқарды. Оның азаматтығы, ұлтжандылығы және отаншылдығы, еңбекқорлығы қалың жұртқа танымал . Өкінішке қарай, дарынды азамат ортамыздан ерте кетті.

Мен Талдықорғандағы Журналистер үйіне Бейсен Құранбектің есімін беру туралы ұсыныс айтылып жүргенін білемін. Бұл – Жетісу жұртшылығының, сондай-ақ барша журналистер қауымының, қалың көрерменнің және жалпы халықтың қалауы. Сондықтан, бастаманы қолдау қажет деп санаймын", - деді президент.

Еске сала кетейік, белгілі журналист Бейсен Құранбек 2020 жылдың 18 мамырында ауыр сырқаттан көз жұмды.

Мақаланың түпнұсқасы: https://kaz.nur.kz/society/1993550-ortamyzdan-erte-ketti-toqaev-zurnalister-uiine-beisen-quranbektin-atyn-beru-turaly-bastamany-qoldady/