Қазақстанда диплом мен аттестат енді Egov жүйесінде QR код арқылы беріле бастайды

Үкімет отырысында Оқу-ағарту министрі Қазақстандағы білім беру процесі мен қызметтерін цифрландыру бойынша жасалатын жаңа бастамалар туралы айтты. Соның бірі Egov және банк қосымшаларындағы QR-код арқылы аттестаттар мен дипломдар беру болмақ, деп хабарлайды KAZ.NUR.KZ.

"Аттестаттар мен дипломдар QR-кодпен цифрлық форматта берілетін болады. Әр оқушының өзіндік сандық профилі болады. Онда оқушының балабақшадан бастап мектеп немесе колледж бітіргенге дейінгі академиялық, әлеуметтік жетістіктері, бағалары бір сөзбен айтқанда барлығы сақталады", - дейді Асхат Аймағамбетов.

Министрдің сөзінше, білім беру аясында ең қажетті барлық қызметтер EGOV және ірі банктердің мобильді қосымшаларында қолжетімді болады.

"Колледждерде білім беру бағдарламаларының бірыңғай реестрін құрамыз, сондай-ақ студенттердің профильдерін және QR-код генерациясы арқылы цифрлық дипломдар беруді енгіземіз", - деп атап өтті Оқу-ағарту министрі.