БАҚ: қазақстандық WhatsApp қолданушыларының деректері интернетке тарап кеткен

Хакерлер қауымдастығының форумында WhatsApp қолданушыларының 487 миллион телефон нөмірін қамтитын мәліметтер базасын сату туралы хабарландыру пайда болды, деп хабарлайды KAZ.NUR.KZ Cybernews сайтына сілтеме жасап.

Хабарландыру 16 қараша күні жарияланған. Сатушының айтуынша, дерекқорда 84 елдегі WhatsApp қолданушыларының дерегі бар көрінеді. Телефон нөмірлерінің басым бөлігі Египет (45 миллион), Италия (35 миллион), Сауд Арабиясы (29 миллион), Франция (20 миллион) және Түркия (20 миллион) азаматтарына тиесілі. Тізімде қазақстандық қолданушылар да бар, олардың саны 3 миллион 214 мың 990.

Cybernews сұранысы бойынша сатушы 1097 британдық және 817 американдық пайдаланушылардың нөмірлерімен бөліскен. Басылым бұл нөмірлердің шынымен де WhatsApp қолданушылары екенін растады.

"Сатушы дерекқорды қалай алғанын егжей-тегжейлі айтпады, ол деректерді жинау үшін "өз стратегиясын пайдаланғанын" атап өтті және дерекқордағы барлық нөмірлер WhatsApp-тың белсенді пайдаланушыларына тиесілі екеніне сендірді", – деп жазады басылым.

Cybernews олар WhatsApp-тың бас компаниясы Meta-ға хабарласқандарын, бірақ әлі жауап алмағандарын айтты.

Мәтіннен қате тапсаңыз, бізге жазыңыз