"Жайылымнан жоғалып кеткен": СҚО-да бір ауылдың 50 жылқысы мұзға батып өлген

СҚО-ның Айыртау ауданы, Әлжан ауылында тұрғындардың бір үйір жылқысы суға батып, өлген. Бұл туралы ІІМ-нің Telegram-дағы POLISIA.KZ ресми жаңалықтар арнасы хабарлады.

Белгілі болғандай, 2 желтоқсан күні СҚО Айыртау ауданының полиция бөліміне Әлжан ауылындағы табында 50 жылқының жетіспеушілігі анықталғаны туралы хабарлама келіп түскен.

Жылқылардың Әлжан ауылының тұрғындарына тиесілі екені анықталған. Жануарлар 27 қарашада еркін жайылымнан жоғалып кеткен.

Іздеу шаралары барысында жоғалған жылқылар Барчи көлінен қатып қалған күйінде табылған. Алдын ала болжам бойынша, жылқылар бақташы болмаған кезде көлдегі мұз үстімен жүрген. Кейін мұз жарылып, суға батып кеткен.

Бүгінде аталған факті бойынша Айыртау ауданының полиция бөліміне арыздар келіп түспеген.

Қазіргі таңда полицейлер болған оқиғаның мән-жайын анықтауда.

Мәтіннен қате тапсаңыз, бізге жазыңыз