Ақтаулық жастар жанжал кезінде бір-бірін қайшымен жарақаттады

Ақтау қаласындағы сауда, ойын-сауық орталығында жастардың жанжалы бір-біріне қайшымен жарақат салумен аяқталды, деп хабарлайды ҚазАқпарат.

"2022 жылғы 23 желтоқсанда сағат 17:35 шамасында 102 кезекші пультіне 16 шағынауданда орналасқан "Ақтау" сауда, ойын-сауық орталығында жас жігіттердің жанжалдасқаны туралы шақыру келіп түсті.

Онда 19 жастағы жігіттер бір-бірімен келіспей қалған. Жігіттердің бірі екіншісінің бетіне жарақат салған", – деп мәлімдеді Маңғыстау облыстық Полиция департаментінің баспасөз қызметінен.

Жәбірленуші Маңғыстау облыстық ауруханасына қаралған. Дәрігерлер оны үйіне қайтарған.

Жанжалдасқандар жұмыстас азаматтар болып шықты, полицияға шағым түсірмеген. Олармен профилактикалық әңгіме жүргізілгені айтылған.