Автокөлікті техникалық байқаудан дұрыс өткізбеген орталықтарға 300 АЕК айыппұл салынады

Экология, геология және табиғи ресурстар вице-министрі Серікқали Мұқатаев техникалық байқау орталықтарының жауапкершілігін күшейтетін заңнамаға қандай өзгерістер енгізілетінін айтты, деп хабарлайды ҚазАқпарат.

Вице-министрдің айтуынша, "Әкімшілік құқық бұзу туралы кодекске өзгерістер мен толықтырулар енгізу туралы" заң жобасына көлік құралын қарамастан міндетті техникалық байқау жүргізгені үшін техникалық байқау орталықтарының жауапкершілігін күшейтуге қатысты түзету енгізілген.

Атап айтқанда,техникалық байқау орталықтарын тізілімнен шығару, 3 жылға дейін қызметке тыйым салу және 300 АЕК-ке дейінгі айыппұл салу ескерілген.

Вице-министрдің сөзіне қарағанда, министрлік Жол картасын нақтылау бойынша жұмыс жүргізген.

Тиісті өзгерістерді енгізу аяқталғаннан кейін пилот режимінде автокөліктерде отынды жағудан шыққан газ құрамының Алматы қаласының техникалық байқау орталықтарында белгіленген талаптарға сәйкестігі тексерілмек.

"Аталған шараларды 2024 жылдың соңына дейін аяқтау жоспарланып отыр. 2020 жылғы 30 желтоқсанда "Техникалық реттеу туралы" Қазақстан Республикасының Заңы қабылданды.

Онда техникалық реттеу саласындағы уәкілетті органға жанар-жағармай құю станцияларында өткізілетін отынның сапасын бақылау функцияларын, яғни экологиялық стандарттарға сәйкестігін реттеу өкілеттігін беру ескерілген", – деді Серікқали Мұқатаев.