Бас прокуратура: Шынында әуежайдың қауіпсіздігі осынша әлсіз емес еді

Бүгін парламент мәжілісінің жалпы отырысында Бас прокуратура қаңтар оқиғасы туралы бейнероликті ұсынды. Онда Алматы әуежайын бүлікшілердің қалай басып алғаны көрсетілді, деп хабарлайды KAZ.NUR.KZ.

Бас прокуратура бүгін бір жыл бұрынғы қаңтар оқиғасына арналған он бір минуттық "Қаңтар оқиғасы: Дерек пен дәйек" атты бейнеролик ұсынды. Онда Алматы әуежайына бүлікшілердің қалай ғана оңай басып кіргені айтылған.

"Бүлікшілер күштік құрылымдарға қосымша көмек келмес үшін автожолдарды, теміржолдарды жауып, әуежайларды өздерінің бақылауына алуға әрекет қылған.

Бесінші қаңтар күні кешке бүлікшілер Ақтөбе әуежайын шабуыл жасайды және сол сәтте Алматы әуежайын басып алады. Бір топ адам Қазаэронавигация мекемесінің ғимаратына баса көктеп кіріп, ұшу-қону жолағындағы жарықты өшіреді.

Шынында әуежайдың қауіпсіздігі осынша әлсіз емес еді. Содырлар келерден жарты сағат бұрын бүкіл күзетке "үйлеріңе қайтыңдар" деген бұйрық болғаны анықталды.

Қаңтар оқиғасы кезінде бірқатар өңірде ұлттық қауіпсіздік комитеті мен полиция департаменттерінің басшылары қарамағандағыларға жұмыс орнын тастап кету жөнінде бұйрық берген", – делінген бейнероликте.