Еліміздегі екі ірі ГЭС "Самұрық-Қазына" қорына өтетін болды

Өскемен және Шүлбі гидроэлектрстанцияларының (ГЭС) мемлекеттік үлесі "Самұрық-Қазына" қорының акцияларын төлеуге берілмек. Үкіметтің тиісті қаулысы "Әділет" АҚЖ сайтында жарияланды.

"АЭС Өскемен ГЭС" және "АЭС Шүлбі ГЭС" жауапкершілігі шектеулі серіктестіктерінің мемлекеттік қатысу үлестері ұлттық қауіпсіздік органдарымен келісілген тиісті саланың уәкілетті органының оң салалық қорытындысын алған жағдайда "Самұрық-Қазына" ұлттық әл-ауқат қоры" акционерлік қоғамының акцияларын төлеуге берілсін", - деп жазылған хабарламада.

Сондай-ақ құжатта Қазақстан Республикасы қаржы министрлігінің мемлекеттік мүлік және жекешелендіру комитеті, энергетика, ұлттық экономика министрліктері "Самұрық-Қазына" ұлттық әл-ауқат қоры" акционерлік қоғамымен бірлесіп, заңнамада белгіленген тәртіппен осы қаулыны іске асыру үшін қажетті шаралар қабылдануы тиіс екені айтылады.

"Осы қаулы қол қойылған күнінен бастап қолданысқа енгізіледі", - деп жазылған хабарламада.

Айта кетейік, өткен жылдың наурыз айында энергетика министрі Өскемен және Шүлбі ГЭС-ы стратегиялық маңызды нысан болғандықтан, жекешелендіруге жатпайтынын әрі сатылмайтынын хабарлаған еді.

Мәтіннен қате тапсаңыз, бізге жазыңыз