Жабық жолда полицейлерге қарсылық көрсеткен жүргізуші әкімшілік қамауға алынды

Қарағандылық полицейлердің заңды талабына бағынбай, ауа райына байланысты жабылған жолға шығып кеткен жүргізуші сот шешімімен әкімшілік қамауға алынды, деп хабарлайды Polisia.kz.

Қарағанды облыстық Полиция департаменті Балқаш қалалық полиция бөлімінің қызметкерлері заңды талапқа бағынбай, тәртіп сақшыларының жұмысына кедергі келтірген 31 жастағы елорда тұрғынын анықтады.

Полицияның хабарлауынша, оқиға ауа райының қолайсыздығына байланысты Алматы – Екатеринбург тас жолының жабылған кезінде болған.

"Жүргізушіге қатысты Әкімшілік құқық бұзушылық туралы кодекстің 667-бабының 1-бөлігіне сәйкес хаттама толтырылды. Әкімшілік материал оның тұрғылықты мекенжайы бойынша соттың қарауына жіберілді", — делінген хабарламада.

13 қаңтар күні Астана қалалық мамандандырылған ауданаралық әкімшілік соттың шешімімен азамат әкімшілік қамауға алынды.