Мемлекет басшысы Лисаков қаласының жылу орталығына барды (фото)

Опубликовано:

Қасым-Жомарт Тоқаев Лисаков қаласының жылу орталығында
Қасым-Жомарт Тоқаев Лисаков қаласының жылу орталығында. Фото: Ақорда

Президент Қасым-Жомарт Тоқаев Қостанай облысына жұмыс сапары барысында "Лисаковскгоркоммунэнерго" мемлекеттік коммуналдық кәсіпорнына қарасты жылу электр орталығына барды, деп хабарлайды Ақорда ресми сайтында.

Мемлекет басшысына жылу орталығының жабдықталуы мен қаланың коммуналдық инфрақұрылымының қазіргі жағдайы жөнінде мәлімет берілген.

"Лисаковскгоркоммунэнерго" кәсіпорнының меншігінде Лисаков қаласын жылумен қамтамасыз ететін орталық қазандық және қалаға жақын Октябрь кентінде орналасқан екі блокты-модульды қазандық бар.

Қасым-Жомарт Тоқаев Лисаков қаласының жылу орталығында
Қасым-Жомарт Тоқаев Лисаков қаласының жылу орталығында. Фото: Ақорда

Лисаков қаласының әкімі Абай Ибраевтың айтуынша, жылу орталығы 1968-78 жылдары пайдалануға берілген. Орталықтағы су жылыту қазандықтары соңғы рет 2020 жылы күрделі жөндеуден өткен. Олардың орташа тозу деңгейі 51 пайызға жеткен. Сондықтан таяу жылдары су жылыту қазандықтарына күрделі жөндеу жүргізу жоспарланып отыр.

Ал жалпы ұзындығы 112 шақырым жылу желісінің тозу деңгейі 41 пайызды құрайды. 2012 жылдан бері "Шағын және моноқалаларды дамыту" бағдарламасы аясында жылу желілерінің инфрақұрылымына қатысты 8 жоба жүзеге асқан. Соның нәтижесінде тозу деңгейі 7 пайызға қысқарып, 41 пайызға дейін төмендеген.

Лисаков қаласындағы жылу электр орталығы
Лисаков қаласындағы жылу электр орталығы. Фото: Ақорда

Соңғы бес жылда жылу құбырларындағы апаттар саны екі есе қысқарған. Қала әкімінің сөзінше, алдағы уақытта жылу желісі мен қаланың басқа да коммуналдық инфрақұрылымын жаңғырту жұмыстары жалғасын табады.

Мемлекет басшысы тұрғын үй-коммуналдық шаруашылық саласының стратегиялық маңызы зор екеніне назар аударып, қала мен облыс әкімдеріне жылыту маусымына дайындық мәселесімен жүйелі түрде айналысуды тапсырды.

Мақаланың түпнұсқасы: https://kaz.nur.kz/society/2006256-memleket-bassysy-lisakov-qalasynyn-zylu-ortalygyna-bardy-foto/