Дәрігерлер Ақтөбеде қарда жүретін көлік соққан бір топ адамның жағдайы туралы айтты

Ақтөбеде демалыс базасының аумағында жасөспірім қарда жүретін көлік бір топ адамды қағып кетіп, оқиға салдарынан 40 жастағы әйел қайтыс болған еді. Дәрігерлер жарақат алып, медициналық мекемеге жатқызылған 49 жастағы ер адам мен бес кәмелетке толмаған баланың қазіргі жағдайы туралы айтты, деп хабарлайды "Хабар 24" арнасына сілтеме жасаған KAZ.NUR.KZ.

Арна мәліметінше, зардап шеккен 16 жастағы бойжеткеннің жағдайы ауыр, жансақтау бөлімінде жатыр.

Миы шайқалған үш бала травматология бөлімінде емделіп жатыр. Олардың жағдайы орташа ауыр деп бағаланды.

Ал 17 жастағы жасөспірім амбулаторлық емделуде - ол тексеруден кейін босатылды.

"Зардап шеккендерді хирург, нейрохирург, реаниматолог, травматолог, ЛОР дәрігері қарады. Науқастардың барлығының жағдайы тұрақты, асқынған жоқ. Оларға қажетті ем-домдар көрсетілуде", - дейді дәрігер Сәкен Нұрымов.

Естеріңізге сала кетейік, Ақтөбеде демалыс базасының аумағында жасөспірім қарда жүретін көлік бір топ адамды қағып кеткен болатын.