Ақсуда белгісіз ер адамның кішкентай қызға шабуыл жасағаны рас па: полиция пікір білдірді

Павлодар облысы Ақсу қаласында белгісіз ер адамның кішкентай қыз балаға "шабуыл жасағаны" жайлы ақпаратқа қатысты полиция пікір білдірді, деп хабарлайды Telegram-дағы "ҚР ІІМ жаңалықтары" ресми арнасы.

Полицияның мәліметінше, ер адамның кішкентай қыз балаға "шабуыл жасағаны" жайлы хабарлама WhatsApp желісінде тараған.

Полиция тұрғындардан бұл ақпаратқа қатысты арыз келіп түспегенін атап өтті.

Сондай-ақ полицейлер сөз етілген ауданды аралап, ақпаратты растайтын дерек таппаған.

Осыған орай полиция қызметкерлері тұрғындардан тек ресми мәліметтерге сүйенуін сұрайды.

Сонымен қатар ведомство жалған ақпарат таратқандар Қылмыстық кодекстің 274-бабына сәйкес жауапкершілікке тартылатынын еске салды.