Атырауда ауыл әкімі трактормен көшедегі қарды күреп жүр (видео)

Әлеуметтік желіде Атыраудағы ауыл әкімінің трактормен қар күрегені туралы видео тарады. Трактор рулінде – Дамбы ауылының әкімі Ұзақбай Байзуллин, деп хабарлайды ҚазАқпарат.

"Мен кәсіби механизор емеспін. Бірақ өзімді тәжірибелі жүргізушімін дей аламын. Көлік жүргізуші мамандығын меңгергенмін. 1980 жылдан бері көлік жүргізіп келемін.

1949 жылы туған ағам Бисенбай ауылдағы Амангелді атындағы колхоздың маңдайалды тракторшысы әрі көркемөнерпаздар үйірмесінің мүшесі болған. Қазақтың ұлттық аспабы – домбыра шертеді.

Мектептің 3-4 сыныптарында оқып жүргенімде, тракторын үйдің алдына әкеліп қоятын. Сол кезде техникаға қызығушылығым оянды", – дейді Ұзақбай Байзуллин.

Әкімнің айтуынша, ол 8 ақпан күні трактордың руліне отырып, күні бойы ауыл көшелерін қардан тазартқан.

"Әрине, қар күреудің қиындығы бар. Сол себептен, алдымен трактор жүргізушісінен қарды қалай күреу қажеттігін сұрап алдым. Кейін трактор руліне отырдым. Менің ойымша, әр азамат елге қызмет етуі қажет. Қар жауып, көлік қозғалысы қиындыған кезде қол қусырып отыра алмадым" дейді Байзуллин.

Видео авторы да, пікір қалдырушылар да ауыл әкімінің бұл ісіне ризашылығын білдірген. Бірақ Ұзақбай Байзуллиннің өзі бұған назар аудармағанын қалайды.

Мәтіннен қате тапсаңыз, бізге жазыңыз