Қазақстанда 20 жылдан астам уақыт құжатсыз тұрған шетел азаматы үйленіп, 5 баланың әкесі атанған

Өзбекстан азаматы 20 жылдан астам уақыт бойы Қазақстанда құжатсыз өмір сүрген. Осы уақыт аралығында ер адам отбасын құрып, бес баланың әкесі атанып үлгерген, деп хабарлайды ІІМ ресми Telegram-арнасы.

Ведомствоның мәліметінше, 1951 жылы туған Өзбекстан Республикасының азаматы Қазақстан аумағына 2000 жылдары келген. Ол осы уақыт аралығында Қазақстан азаматшасымен отбасын құрып, араларында бес бала дүниеге келген.

72 жастағы шетелдіктің айтуынша, сол жылдары ол құжат дайындамақ болған, алайда қажетті құжаттарды толық жинақтап, тапсырмаған.

"Атырау қаласы ПБ Көші-қон полиция бөлімінің қызметкерлері шетелдіктің жеке басын анықтай отырып, еліне қайтару үшін тиісті құжаттар тізбесін Ақтау қаласындағы Өзбекстан Республикасының елшілігіне жолдаған", - деп жазылған хабарламада.

Мәтіннен қате тапсаңыз, бізге жазыңыз