Бүгін еліміздің үш ірі қаласында күн жылынады деп күтілуде

Астана, Алматы, Шымкент тұрғындары үшін осы апта жылы ауа райымен басталмақ. Сонымен бірге үш мегаполисте де күн ашық болады деп болжанып отыр, деп хабарлайды "Қазгидромет" РМК.

Бүгін Астанада күн ашық, көшпелі бұлт шығады деп күтіліп отыр. Күндіз ауа температурасы -5…-7 градус деңгейінде болса, түнде -6…-8 градус болуы ықтимал. Желдің жылдамдығы 9-14 м/с-ке дейін жетеді.

Алматыда күндіз ауа райы +3…+5 градусқа дейін жылынады, ал түнде термометр көрсеткіштері -2…-4 градусқа дейін төмендейді. Оңтүстік астанада жауын-шашын болмайды деп болжануда. Сол сияқты қалада желдің жылдамдығы 0-5 м/с-ке дейін жетеді.

Дүйсенбі күні Шымкент тұрғындарын да ашық әрі жылы күн күтіп тұр, күндіз ауа температурасы +9...+11 градусқа дейін жылынады. Ал түнде сынап бағанасы -1…-3 градусқа дейін төмендемек. Желдің жылдамдығы 5-10 м/с деңгейінде болады.