Әскери институттың бірінші курс курсанты өлі күйінде табылды

3 наурыз күні Құрлық әскерлері Әскери институтының оқу орталығының 1-курс курсанты өлі күйде табылды. Бұл туралы Қорғаныс министрлігі Telegram арнасында хабарлады.

"2023 жылғы 3 наурызда Құрлық әскерлері Әскери институтының оқу орталығының қарауылдық постында 1-курс курсанты өлі күйінде табылды", - делінген Қорғаныс министрлігінің хабарламасында.

Ведомствоның мәліметінше, аталған факті бойынша сотқа дейінгі тергеу басталды. Оқиғаның мән-жайын анықтауға Құрлық әскерлері бас қолбасшысының бірінші орынбасарының бастауымен арнайы комиссия жіберілген.

Осы орайда министрлік Қылмыстық-процестік кодексінің 201-бабына сәйкес өзге ақпарат тергеу мүддесі үшін жария етуге жатпайтынын мәлімдеді.

"Қарулы Күштердің басшылығы мен жеке құрамы сарбаздың отбасы мен жақындарына орны толмас қазасына ортақтасып, қайғыра көңіл айтады", - деді ведомстводан.