Бейсенбіде Қазақстанның ірі қалаларында найзағай ойнап, қатты жел соғуы мүмкін

Бейсенбі, 9 наурыз күн Алматы мен Шымкентте тұман мен найзағай салдарынан дауылдық ескерту жарияланды. Ал Астана қаласында қатты жел соғуы мүмкін, деп хабарлайды "Қазгидромет" РМК ресми сайтында.

Синоптиктердің болжамынша, бүгін Алматыда күн күркіреп, секундына 15-20 метрге дейін жел соғады. Осы ретте ауа температурасы күндіз +18...+20°C, түнде +2...+4°C жылы болады. Сонымен қатар шаһарда тұман салдарынан дауылдық ескерту жарияланды.

Астанада, мамандардың ақпаратынша, күн райы ашық болады. Алайда қалада екпіні 15-20 м/с дейін жететін жел соғуы ықтимал. Күндіз -2...-4°C, түнде -11...-13°C суық болады деп күтілуде.

Шымкентте де бүгін найзағай ойнап, желдің күші 8-13 м/с, екпіні 20-25 м/с дейін жетуі мүмкін. Күндіз сынап бағанасы +13...+15°C дейін көтерілсе, түнде ауа температурасы +3...+5°C шамасында болады. Найзағай салдарынан үшінші мегаполисте дауылдық ескерту жарияланды.

Мәтіннен қате тапсаңыз, бізге жазыңыз