"Шымбұлақ" демалыс орны ресми түрде Гиннестің рекордтар кітабына енді

"Шымбұлақ" тау-шаңғы курорты ресми түрде "әлемдегі ең биік түнгі шаңғы трассасы" номинациясы бойынша Гиннестің рекордтар кітабына енді. Бұл туралы демалыс орны Instagram парақшасында хабарланды.

"Шымбұлақ" рекордын Гиннес рекордтар кітабы кеңсесінің судьясы Шейда Субаши-Гемиджи ресми түрде растады.

"Мен осында және қазір, 2023 жылғы 26 ​​наурызда сіздермен бірге Шымбұлақ курортында болғаныма өте қуаныштымын. Шымбұлақ тау курорты әлемдегі ең ұзақ түнгі (тау шаңғысы – ред.) трасса ретінде рекорд орнатуға тырысты", – деді ол.

Субаши-Гемиджи ең ұзын түнгі жолдың ең төменгі рекорды теңіз деңгейінен 3100 метр биіктікте екенін атап өтті.

"Барлық дәлелдемені – бейнематериалдарды, фотосуреттерді, өлшеу процесінің құжаттарын анықтағаннан кейін мен "Шымбұлақ" тау-шаңғы курортының биіктігі 3200 метр болатын әлемдегі ең биік түнгі шаңғы трассасы ретінде Гиннестің рекордтар кітабына енгенін ресми түрде растай аламын. Бұл әлемдегі жаңа рекорд", – деді Субаши-Гемиджи.

Субаши-Гемиджи тау шаңғысы курортының бас директоры Ринат Әбдірахмановқа әлемдік рекордты растайтын сертификатты табыс етті. Сахна төріне Мәдениет және спорт министрі Асхат Оралов та шықты.

Шара соңында лента салтанатты түрде қиылып, сондай-ақ түнгі ең биік шаңғы трассасынан жаппай сырғанап түсу рәсімі өтті.

"Шымбұлақ" тау-шаңғы курорты Алматының орталығынан 15 минуттық жерде, Іле Алатауының әсем шатқалында орналасқан. Мұндай ақпарат демалыс орнының ресми сайтында берілген.

Шымбұлақтың негізі 1954 жылы қаланғаны айтылады. 50 жылдардың ортасынан бастап ол кеңестік шаңғышылардың жаттығу базасы болды, оның баурайында КСРО және Қазақстан чемпионаттары өткен.