26 градусқа дейін жылы: сейсенбіде Қазақстан мегаполистерінде шуақты ауа райы күтілуде

Синоптиктер 28 наурызда ел аумағы мен Қазақстанның ірі үш қаласы - Алматы, Астана және Шымкентте ауа райы қандай болатынын болжады деп, хабарлайды "Қазгидромет" РМК-ға сілтеме жасаған KAZ.NUR.KZ.

Метеорологтардың мәліметінше, жоғары қысым әсерінен бүгін республиканың басым бөлігінде негізінен жауын шашынсыз ауа райы сақталады. Тек Қазақстанның батысында атмосфералық фронтальды бөліктердің әсерінен жаңбыр жауады.

Сондай-ақ республика бойынша тұман, желдің күшеюі, оңтүстік-батыста шаңды дауыл сақталады.

Ал Алматыда бүгін көшпелі бұлт шығады, жауын-шашын жаумайды, күндіз +18....+20 градусқа дейін жылы болса, түнде ауа температурасы +6...+8 градусқа дейін төмендейді. Желдің жылдамдығы секундына 0-ден 5 метрге дейін жетеді.

Синоптиктердің болжамынша, сейсенбіде Астанада да жауын-шашынсыз ауа райы сақталады. Күндіз термометр +11...+13 градусты көрсетсе, түнде -2 градусқа дейін төмендейді. Аздап жел соғуы ықтимал (жылдамдығы 2-7 м/с). Сонымен қатар бүгін қалың тұманға байланысты елордада дауылдық ескерту жарияланып отыр.

Шымкентте бүгін күн ашық, күндіз +24....+26 градусқа дейін жылы болса, түнде ауа температурасы +13...+15 градусқа дейін төмендейді деп күтілуде. Сондай-ақ мегаполисте жел күшеюі мүмкін (жылдамдығы 5-10 м/с ).