Ауруханада балағат сөз айтқан ШҚО тұрғыны қамауға алынды

ШҚО-да аурухана ішінде балағат сөз айтқан әйел Шемонаиха аудандық сотының шешімімен 3 күнге әкімшілік қамауға алынды, деп хабарлайды YK-news.kz сайтына сілтеме жасаған KAZ.NUR.KZ.

Басылымның жазуынша, Шемонаиха аудандық ауруханасына ауыл тұрғыны аяғындағы жарақаты бойынша жүгінген. Әйел қабылдау бөлмесіне жеткізіліп, ол басқа науқастармен бірге дәрігердің тексеруін күткен.

Сол уақыт аралығында пациент өзінің наразылығын қоғамдық орындарда айтуға болмайтын балағат сөздермен білдірген. Аурухана қызметкерлері науқасты тәртіпке шақыру үшін полицияға шақыруға мәжбүр болған.

Басылымның мәліметінше, оқиға өткеннен кейін екі аптадан соң әйелге қатысты сот отырысы өткен. Сотта заң бұзушының қоғамдық жерде балағат сөздер айтқаны үшін жауапкершілікке тартылуы жыл басынан бері бірінші рет емес екені анықталған.

Сот отырысының нәтижесінде судья тұрғынды үш тәулікке әкімшілік қамауға алу туралы шешім шығарған.

Мәтіннен қате тапсаңыз, бізге жазыңыз