Еліміздің оңтүстігінде елден жанармайды сыртқа шығарған жүргізушілерді полицейлер ұстауда

Жамбыл және Түркістан облыстарында 10 сәуірден бастап ішкі істер органдары көліктік бақылау инспекциясымен бірлесіп, жанар-жағармайды елден тыс жерлерге әкетуге жол бермеу бойынша рейдтік іс-шаралар жүргізуде, деп хабарлайды Polisia.kz ақпараттық медиа-порталы.

Медиа-порталдың жазуынша, полиция қызметкерлері тиісті рұқсатсыз қосымша жанармай бактарын орнату арқылы көлік құралдарын пайдалану ережелерін бұзу фактілерін анықтауға ерекше назар аударуда.

"Осындай құқық бұзушылық үшін әкімшілік құқықбұзушылық туралы кодекстің 590-бабының 7-бөлігі ("Тиісті рұқсатсыз қайта жабдықталған көлік құралын басқару") бойынша әкімшілік жауапкершілік қарастырылған", - делінген ведомство хабарламасында.

Полицияның мәліметінше, үш күнде заң бұзған 57 жүргізуші жауапқа тартылған. Сондай-ақ 21 әкімшілік материал бойынша көлік құралдарын одан әрі пайдалануға тыйым салынған.

Еске сала кетейік, 2022 жылы бензин, дизель отынын және мұнай өнімдерінің жекелеген түрлерін Қазақстан аумағынан автокөлікпен әкетуге 6 ай мерзімге тыйым салынған еді.

Биыл қаңтарда бұл тыйым тағы 6 айға ұзартылды.