"Мектепте, көшеде, тіпті, үйде болып жатыр": Тоқаев балаларға қатысты жасалып жатқан жантүршігерлік қылмыстарға тоқталды

Мемлекет басшысы еліміздің әлеуметтік-экономикалық дамуы жөніндегі кеңесте Қазақстанда балаларға қатысты жантүршігерлік қылмыстардың жиілеп кеткенін айтып, әйелдер мен балалардың құқығын қорғауды күшейтуге шақырды. Бұл туралы Ақорда Telegram-дағы ресми арнасында хабарлады.

"Тағы бір назар аударатын мәселе – жас ұрпақтың қауіпсіздігі. Балаларға қатысты жантүршігерлік қылмыстар жиілеп кетті. Мұндай оқиғалар мектепте, көшеде, тіпті, үйде болып жатыр. Сорақы жағдайлар оқушылардың өзіне қол жұмсауына себепкер болып отыр.

Тіпті ата-аналардың өздері баласына қорлық көрсетіп, оның арты қайғылы жағдайға ұласып жатады. Отбасындағы зорлық-зомбылықтың алдын алу жұмысы әлсіз. Жауапты мекемелер мен құқық қорғау органдарының қызметі ойдағыдай нәтиже берген жоқ. Тұрмыстық зорлық-зомбылықтың алдын алу саясатын қайта қарауымыз керек.

Әйелдер мен балалардың құқықтарын қорғау шараларын заңмен күшейту керек. Отбасы құндылықтарын дәріптеу ісіне ерекше көңіл бөлген жөн. Тағы да ескертемін, біз қоғамдағы, көшедегі, тіпті әр үйдегі қауіпсіздікті қамтамасыз етпесек, дамыған елдердің қатарына қосылуымыз қиын болады. Азаматтарымыз еркін жүріп-тұратын қауіпсіз қоғам құруымыз қажет", – дейді Қасым-Жомарт Тоқаев.