Павлодар облысында екі аптаға интернет өшірілетіні рас па

Павлодар облысында екі апта бойы интернеттің толық өшірілетіні туралы қауесеттерді облыстың цифрлық технологиялар басқармасы жоққа шығарды. Түсініктеме департаменттің Instagram-дағы ресми парақшасында пайда болды.

Бұған дейін әлеуметтік желіде 26 сәуір мен 10 мамыр аралығында Павлодар облысында интернет толығымен өшіріледі деген ақпарат тараған болатын.

Pavlodarnews сайтының хабарлауынша, желіде тараған хабарламада белгісіз әйел Павлодардағы дүкендердің біріне "26 сәуір мен 10 мамыр аралығында интернет мүлдем болмайды, электронды бақылау-кассалық машина иелері калькуляторлар мен таразыларды қолдануға тиіс" деген.

Хабарлама авторлары облыс тұрғындарына банк шотындағы жинақтарын екінші деңгейлі банктердің есеп шоттынан ақшаларын алуға кеңес берген.

Алайда облыстық цифрлық технологиялар басқармасы интернет өшірілуі мүмкін деген ақпаратты жоққа шығарды.

"Бұл ақпарат шындыққа жанаспайды, 2023 жылдың 24 сәуіріндегі жағдай бойынша барлық байланыс операторының ақпараттық-телекоммуникациялық инфрақұрылымы қалыпты жұмыс істеуде.

Сенімді көздерден алынған ақпаратқа сеніп, фейк таратпауға шақырамыз", - делінген ведомство хабарламасында.

Мәтіннен қате тапсаңыз, бізге жазыңыз