Көкшетауда зират маңынан адам сүйектері табылды

Көкшетауда ескі зират маңынан қапшыққа салынған адам сүйектері табылды. Оны сол маңды жинастырып жүрген тұрғындардың бірі көріп қалған, деп хабарлайды KTK телеарнасы.

Телеарнаның хабарлауынша, бұл қорымға қазір адам жерленбейтін көрінеді. Бірақ тұрғындар туыстарының мазарын тазалауға келіп тұрады.

Бейіт басында тазалық жасап жүрген бір әйел ағаш арасында жатқан қапшықты байқап қалып, ашып қарайды. Оның ішіне адамның басы мен өзге де сүйектер салынған екен. Әйел бірден полицияға хабарласқан.

Қазір тәртіп сақшылары сараптама жасап, қаңқаның кімге тиесілі екенін анықтап жатыр.

"Көкшетау полиция бөліміне хабар жетісімен, жедел тергеу тобы оқиға орнына барды. Қазір қапшыққа салынған сүйектер сот-медициналық сараптамасына жіберілді. Сараптама қорытындысы дайын болғаннан кейін ғана процесуалдық шешім қабылданады", – дейді Ақмола облысы ПД баспасөз қызметінің ресми өкілі Әсем Әбдірахманова.

Дереккөз: КТК