Қазақстанда азаматтардың тууы мен өлімін мемлекеттік тіркеу қызметі тегін болып қалды

24 сәуір күні Азаматтық хал актілерін мемлекеттік тіркеу қызметтеріне ақы төлеу мөлшерін айқындау бойынша тиісті бұйырық жобасы қайта қаралып, адамның тууы мен өлімін мемлекеттік тіркеу қызметі тегін болып қалды. Жаңа құжат Ашық НҚА порталында жарияланды, деп хабарлайды KAZ.NUR.KZ.

Айта кетейік, бұған дейін елімізде баланың тууын мемлекеттік тіркеу, әке болуды (ана болуды) белгілеу, баланы асырап алу үшін, атын, тегін және әкесінің атын өзгертуге байланысты тууды мемлекеттік тіркеу, сондай-ақ адамның өлімін мемлекеттік тіркеу ақылы болуы мүмкін екенін хабарлаған едік.

Тиісті бұйырық жобасы қоғамдық талқыға шығарылған еді.

Енді қайта қаралған құжатқа сәйкес, атын, әкесінің атын, тегін өзгертуге байланысты тууды мемлекеттік тіркеуді қоспағанда, қалған қызметтер тегін болып қалды. Бұл қызмет үшін қосылған құн салығын (ҚҚС) есептегенде 1 932 теңге, есептемегенде 1 725 теңге төлеу керек болады.

Сондай-ақ некені мемлекеттік тіркеу үшін 3 864 теңге (ҚҚС-пен есептегенде), өзара келісім бойынша некені бұзуды мемлекеттік тіркеу үшін - 7 728 теңге (ҚҚС-пен есептегенде) көлемінде баж салығын төлеу қажет.

Тағы қандай мемлекеттік тіркеу қызметтері ақылы және тегін екенін толығырақ Ашық НҚА порталынан біле аласыз.

Мәтіннен қате тапсаңыз, бізге жазыңыз