Алматы облысында ішінде сәбиі бар бесік арбаны жолдың қақ ортасына тастап кеткен

Әлеуметтік желіде Алматы облысында бесік арбадан табылған сәби туралы ақпарат пайда болды. Полиция баланың анасын анықтап, жауапкершілікке тартты.

KYN.KZ жаңалықтар агенттігінің Instagram желісіндегі парақшасында ерлі-зайыпты жолдың қақ ортасынан бесік арбаға салынған баланы тауып алғаны туралы ақпарат пайда болды. Оның жанында ата-анасы болмаған. Жазбадағы ақпаратқа сәйкес, ерлі-зайыпты баланың ата-анасын бір сағаттан артық іздеген, алайда сол күйі таба алмаған.

Алматы облысы полиция департаментінің NUR.KZ тілшісіне хабарлауынша, баланың анасы анықталған.

"15 мамырда Қарасай аудандық ПБ сағат 10.08-де Үлкен Алматы айналма жолы тасжолының 5 километрінде кішкентай бала табылған. Аталған ақпарат Қарасай ауданы полциясында тіркелді. Аталған фактіні тексеру барысында оқиға орнына дереу полиция жасағы жіберіліп, көп ұзамай баланың анасы анықталды", - делінген полиция хабарламасында.

Аталған факті бойынша полиция әйелге ӘҚбК 127-бабы 1-бөлігі бойынша әкімшілік хаттама толтырған.

Сонымен қатар сәбидің ата-анасымен профилактикалық, түсіндірме сипаттағы әңгіме жүргізілген.