Астанада жеңіл көлік қарсы жолаққа шығып кетіп, автобуспен соқтығысты

Астанада көлік қарсы жолаққа шығып кетіп, автобусқа соғылды. Оқиға салдарынан бірнеше адам ауруханаға жеткізілді, деп хабарлайды KAZ.NUR.KZ.

Оқиға орнынан түсірілген кадрлар Instagram желісіндегі astana.dorogi аккаунтында жарияланды.

Видеода – автобус, ал оның жанында – жеңіл көлік. Соқтығыс салдарынан екі көліктің де алдыңғы жағы зақымданған. Адамдар жиналып қалған.

Хабарламада жол апатының Жұмабаев көшесінде болғаны, оқиға орнына бірден 5 жедел жәрдем көлігі келгені айтылған.

Елордалық полиция департаменті NUR.KZ тілшісіне бірнеше адамның жараланғанын хабарлады.

"4 маусым күні сағат 15:33-те М.Жұмабаев көшесімен келе жатқан Nissan көлігінің жүргізушісі қарсы жолаққа шығып кетіп, маршруттық автобуспен бетпе-бет соқтығысқан. Жол апаты салдарынан Nissan көлігіндегі зардап шеккен үш адам ауруханаға жеткізілді.

Аталмыш факті бойынша тергеу амалдары жүргізілуде. Астана полиция департаменті жол қозғалысы ережелерін қатаң сақтауды ескертеді", – деп хабарлады қалалық полиция департаментінің баспасөз қызметі.