Оралда жол қозғалысын газетпен реттеген кім: видеоға қатысты полиция пікір білдірді (видео)

Оралда бағдаршамы сөніп қалған көшеде кептеліске тап болған жүргізушілерге газетпен жол көрсетіп, көмектескен ер адамның видеосы тарады. Видеоға қатысты құқық қорғау органдары пікір білдірді, деп хабарлайды, ІІМ жаңалықтары Telegram-дағы ресми арнасында.

Медиа-порталдың мәліметінше, қазнетте қолына газет алып, жол қиылысында тұрып қалған көліктерге бағыт-бағдар берген ер адамның видеосы тарады.

Ведомство сол кезде Орал қаласында жарық сөніп, қаланың кей бөліктерінде бағдаршамдар жұмыс істемей қалғаны белгілі болғанын атап өтті.

ІІМ дерегінше, бағдаршамы сөніп қалған көшеде кептеліске тап болған жүргізушілерге газетпен еңбек демалысындағы полиция қызметкері жол көрсеткен.

"Сағат 16:15 шамасында Әбілқайырхан даңғылы мен Сырым Датұлы көшесінің қиылысында жол кептелісі болып, автокөліктердің жүруі қиындаған. Осы уақытта кептеліске тап болған полиция қызметкері Руслан Жексенов автокөлігін тұраққа қойып, қолына іліккен газетті арнайы таяқша орнына қолданып, бағыт-бағдар жасады", - делінген хабарламада.

Жолаушылар мен жүргізушілер осы сәтті бейнекамераға түсіріп, алғысын білдіріп, әлеуметтік желіде жариялаған.

Басылымның жазуынша, полиция қызметкері Руслан Жексенов қазіргі уақытта кезекті еңбек демалысында бола тұра, орын алған кептеліске бей-жай қарамай, жүргізушілерге көмектескен.

Мәтіннен қате тапсаңыз, бізге жазыңыз