Ақмола облысында қола дәуірінде жерленген адамның сүйегі табылды

Ақмола облысында "Қазыналы қазба - ұлт құндылығы" жобасы аясында жүргізілген археологиялық қазба жұмыстары кезінде Қола дәуірінде жерленген адамның сүйегі мен әшекей бұйымдары табылды, деп хабарлайды Azattyq Rýhy.

Ақмола облысы мәдениет басқармасының Тарихи-мәдени мұраны қорғау және пайдалану орталығы мамандарының хабарлауынша, Қызылұйым ауылы маңындағы қорғанды қазу жұмыстары жүргізілген.

Жұмыс барысында оңтүстік сектордағы сұр дақты ашу кезінде 1,7х0.65 м тереңдікте адамның жерленгені анықталған.

Адам сүйегі оң жағымен, басы солтүстік-батысқа қарай қаратып, қол-аяғы бүгілген күйде жатқызылған.

"Нашар сақталған остеологиялық қалдықтар табылды, оның ішінде бас сүйектің бөліктері, білек сүйектері, аяқтың тірсек сүйектері, аздап жамбас сүйектері жарым-жартылай сақталған. Сүйек қалдықтарының мойын бөлігінде 20-дан астам пасталы моншақтары (алқа) табылды.

Жерлеу ерекшеліктеріне сүйене отырып, уақыт кезеңі қола дәуіріне жатады деп болжауға болады (б.з.д. алғашқы 1-2 мың жылдық).

Бұл нұсқаның толық расталуы қорғанды толық зерттеп, табылған жәдігерлерге тиісті талдау жүргізгеннен кейін белгілі болады", – деп түсіндірді орталық мамандары.

Мәтіннен қате тапсаңыз, бізге жазыңыз