Елордада Астана күніне орай отшашу бола ма

Келесі аптада, 6 шілде күні Қазақстанда Астана күні тойланады. Осыған байланысты Астана әкімдігінің баспасөз қызметі қалада мерекелік отшашу бола ма деген сауалға жауап берді, деп хабарлайды KAZ.NUR.KZ.

"Биыл қала күні отшашу болмайды", – дейді әкімдіктегілер.

Дегенмен, ведомство Астананың 25 жылдығына орай 100-ден астам іс-шараны өткізу жоспарланып отырғанын атап өтті. Оның 90-ға жуығы елорданың барлық тұрғыны мен қонақтары үшін тегін болады.

"Сонымен қатар мереке күндері бірқатар әлеуметтік нысандар ашылады, оның ішінде Оқушылар сарайы, дене шынықтыру-сауықтыру кешені, аулалар, қоғамдық орындар, үлескерлерге пәтер кілттерін табыстау және т.б. шаралар болады", – делінген хабарламада.

Еске салайық, 2023 жылы Астана күні, 6 шілде бейсенбіге келеді. Жұмыс уақытын ұтымды пайдалану үшін 1 шілде сенбіден демалыс күні 7 шілде жұмаға ауыстырылды.

Осылайша, айдың бірінші демалыс күні, сенбі, 1 шілде жұмыс күні болса, одан кейін ел тұрғындары төрт күн қатарынан – 6-9 шілде аралығында демалады.