Алматы облысында екі шетел азаматының денесі табылды

Қаскелеңде жеке үйлердің бірінен жергілікті тұрғын екі ер адамның денесін тапқан. Қаза тапқандар шетелдіктер екені анықталды, күдікті ұсталды, деп хабарлайды KAZ.NUR.KZ Алматы облыстық ПД жетекшісі Бауыржан Әленовтің Instagram желісіндегі парақшасына сілтеме жасап.

Әленовтың айтуынша, пышақ жарақаттары бар екі ер адамның денесін жеке тұрғын үйдің аумағынан 26 маусым күні жергілікті тұрғын тауып алған. Полиция Қылмыстық кодекстің 99-бабы 2-бөлігі 1-тармағы "Екі немесе одан да көп адамды өлтіру" бойынша қылмыстық іс қозғады.

Тәртіп сақшылары қаза тапқандардың Тәжікстан азаматы екенін анықтады. Қылмыс жасады деген күдікпен сол республиканың азаматы ұсталды.

"Жедел-іздестіру іс-шаралары барысында полицейлер күдіктінің орнын анықтап, ұстады. Қазіргі уақытта ол уақытша ұстау изоляторына қамалды. Аталған факті бойынша сот-медициналық сараптама тағайындалып, сотқа дейінгі тергеу басталды. Тергеу мүддесі үшін басқа мәліметтер жария етілмейді", – деді облыстық полиция департаментінің бастығы.