Алматылық компанияларды 620 млн теңгеге алдап соққан кәсіпкер сотталды

ҚМА Алматы қаласы бойынша департаменті Almaty Kuat ЖШС директорына қатысты алаяқтық және аса ірі көлемде қаржыны жылыстату фактісі бойынша сотқа дейінгі тергеп-тексеруді аяқтады. Бұл туралы Қаржылық мониторинг агенттігінің Telegram-дағы ресми арнасында хабарлады.

"Тергеу барысында ЖШС директоры Алматы қаласының индустриалды аймағына қатысушы 10-нан астам шаруашылық жүргізуші субъектілерімен электр энергиясын жеткізу шартын жасасып, электр энергиясын тұтынушыларды, сондай-ақ өндіруші және жеткізуші ұйымдарды алаяқтық жолмен электр энергиясын тұтынғаны үшін төлем шоттарын жазып, екі жыл бойы кәсіпкерлер электр энергиясы үшін негізсіз ақы төлеп келгені анықталды", -делінген хабрламада.

Осылайша, Almaty Kuat ЖШС 620 млн теңгеден астам шығын келтірген.

ҚМА мәліметінше, кейін жедел-іздестіру шаралары барысында жоғарыда аталған ЖШС директорының мәмілелер арқылы қылмыстық жолмен алынған ақшалай қаражаттарды заңды айналымға түсіргені анықталған.

Сот қаулысымен жалпы сомасы 134 млн теңгеден астам жер телімдері мен құрал-жабдықтарға тыйым салынды.

Сот үкімімен ЖШС директоры кінәлі деп танылып, мүлкі тәркіленген. Ол 6,5 жылға бас бостандығынан айырылды.