Өскеменде тыйым салынған діни кітаптарды сақтаған ер адам айыппұл арқалады

Өскемен қаласында тыйым салынған діни кітаптарды сақтаған 31 жастағы ер адамға сот үкімі шықты. Бұл туралы ҚазАқпарат қалалық әкімшілік құқық бұзушылық істері жөніндегі мамандандырылған сотына сілтеме жасап хабарлайды.

Агенттіктің қалалық соттың мәліметіне сүйеніп жазуынша, ер адам тыйым салынған діни кітаптардың суретін әлеуметтік желіге салған.

Желіге мониторинг жүргізген полиция қызметкерлері мұны байқап, оған қатысты іс қозғаған. Алайда сот барысында азамат кінәсін мойындамай, кітаптардың өзінікі еместігін айтқан.

Сондай-ақ ер адамның ұялы телефонынан діни сипаттағы аудиоқосымша да табылған.

Сот үкімімен айыпталушы ҚР ӘҚБтК-нің 453-бабының 4-бөлігі бойынша кінәлі деп танылып, оған 241 500 теңге айыппұл салынған.

Айта кетейік, бұған дейін Түркістанда кәмелетке толмаған 70-ке жуық балаға заңсыз діни сабақ өткізген азамат анықталған еді.

Мәтіннен қате тапсаңыз, бізге жазыңыз