Алматы маңында сауда орталығында ер адам қыз баланы тепкен: жағдайға қатысты Динара Закиева пікір білдірді

Алматы маңындағы сауда орталығында қызды тепкен шетелдіктің әрекеті неліктен бұзақылық деп бағаланды? Бұл сұраққа балалар омбудсмені Динара Закиева Facebook-тегі ресми парақшасында жауап берді.

"Кеше маған сауда орталығында қыз баланы теуіп құлатқаны туралы ақпарат келіп түсті.

Бұл жайт "Бұзақылық" бабы бойынша тіркелді. Күдікті адам ұсталып, УҰИ-на қамауға алынды. Алматы облысы ІІМ ПД-мен байланыстамын", - деп түсіндірді балалар омбудсмені.

Оның сөзінше, кішкентай қызды тепкен шетелдік әуелі Қазақстанда жазаланып, кейін сот шешімі күшіне енгеннен соң оны Қазақстан Республикасы шекарасынан шығаруға бағытталған сот процесі басталады.

Сондай-ақ ол бүгінде заңнамада балаларға қатысты қылмыстың осындай құрамына байланысты бап жоқ екенін атап өтті.

"Нәтижесінде тұлға жауапқа "кәмелетке толмағанға қатысты жасалған іс-әрекет" деген ауырлатушы біліктілік белгісі де жоқ "Бұзақылық" бабы бойынша тартылады.

Осыған байланысты біз қазір ІІМ-мен бірлесіп, заңнамаға балаларға жасалған зорлық-зомбылыққа қатысты тиісті баптарды енгізумен жұмыс істеп жатырмыз.

Жалпы, түзетулер балалардың қауіпсіздігін қамтамасыз етуге қатысты әртүрлі саламен байланысты. Заңнамаға ұсыныстар пакетін парламентке осы күзде беруді жоспарлап отырмыз", - деді Динара Закиева.