"Найзағай, 39 градусқа дейін ыстық": бүгін еліміздің ірі қалаларында қандай ауа райы күтіледі

Синоптиктер бүгін, 3 тамызда Алматы, Астана және Шымкентте күн райы қандай болатынын болжады. Бұл туралы "Қазгидромет" РМК ресми сайтында хабарланды.

Метеорологтардың мәліметінше, бүгін Астанада найзағай ойнап, желдің екпіні 15 м/с-ке дейін жетеді. Соған байланысты елордада дауылдық ескерту жарияланды. Астанада термометр бағаны күндіз +30...+32 градусты көрсетсе, түнде ауа температурасы +16...+18 градусқа дейін төмендейді.

3 тамызда Алматыда күн ыстық болып, жауын-шашынсыз ауа райы күтіледі. Оңтүстік астанада күндіз ауа температурасы +35...+37 градусқа жетеді, түнде мегаполисте ауа температурасы +23...+25 градусқа дейін төмен болады деп болжануда. Желдің жылдамдығы 3-8 м/с болады.

Шымкентте де ауа райы жауын-шашынсыз, қалада қатты ыстық әлі де сақталады. Үшінші мегаполисте күндіз термометр көрсеткіші +37...+39 градусқа дейін көтерілсе, түнде ауа температурасы +21...+23 градусқа дейін төмендейді. Желдің жылдамдығы 8-13 м/с болады.