Алматыда заңсыз жүрген 11 африкалық анықталды

Алматылық полицейлер Қазақстанда заңсыз жүрген Африканың 11 азаматын анықтады. Бұл туралы Polisia.kz ақпараттық медиа-порталында хабарланды.

Ведомствоның хабарлауынша, Алматы полицейлері жергілікті рейд кезінде заңсыз жүрген шетел азаматтарын анықтаған.

"Тек бір аптаның ішінде Қазақстанда заңсыз тұрып жатқан Африка континентінің 11 азаматы анықталды", – делінген хабарламада.

Ведомство мәліметінше, Алматы қаласының мамандандырылған ауданаралық әкімшілік сотының қаулысымен олар Қазақстаннан шығарылды.

"Сондай-ақ профилактикалық іс-шараларды жүргізу барысында Қазақстанның көші-қон саласындағы заңнамасын бұзғаны үшін шет елдердің 10 және көршілес мемлекеттердің 137 азаматы әкімшілік жауапкершілікке тартылған. 23 шетелдік мемлекеттен шығарылды", – деп атап өтті Алматы қалалық полиция департаменті көші-қон қызметі басқармасының бастығы Асхат Бутунчинов.