Қызылорда облысында жоғалып кеткен жеті жасар қыздың денесі табылды
Опубликовано:
Қызылорда облысында жоғалып кеткен жеті жасар қыздың денесі табылды. Полицияның мәліметінше, оның денесінен зорлық-зомбылық іздері байқалмаған, деп хабарлайды Polisia.kz.
Полицияның мәліметінше, 7 тамызда Қармақшы аудандық полиция бөліміне Тұрмағанбет ауылының тұрғынынан 7 жастағы қызының жоғалғандығы туралы хабарлама келіп түсті. Әкесінің айтуы бойынша, оның қызы 6 тамыз күні кешкі уақытта үйінен шығып кетіп, қайта оралмаған.
Қыздың ата-анасы және туыстары қызды өз күштерімен табуға тырысқан. Алайда іздеу жұмыстары нәтиже бермеген соң полицияға жүгінген.
"Хабарлама түскен сәттен бастап полиция қызметкерлері дереу іздеу жұмыстарына кірісті. Жоғалған қызды іздеуге Қармақшы аудандық полиция бөлімінің жеке құрамы, ТЖД, аудан әкімдігінің қызметкерлері, еріктілер, жалпы 60-тан астам адам жұмылдырылды.
Сондай-ақ қызды табу мақсатында екі дрон пайдаланылды. Бүгін сағат 13:00 шамасында қыздың мәйіті "Үбіс" каналынан табылды. Мәйіттің денесінде зорлық-зомбылық белгілері байқалмайды", - деп хабарлады ведомстводан.
Алдын ала мәліметтерге сәйкес, қыз суға батып кеткен. Сотқа дейінгі тергеп-тексеру әрекеттері жүргізілуде, тиісті сараптамалар тағайындалды.
Мақаланың түпнұсқасы: https://kaz.nur.kz/society/2031544-qyzylorda-oblysynda-zogalyp-ketken-zeti-zasar-qyzdyn-denesi-tabyldy/
