Алдағы күндері елімізде күн суытып, қатты жауын-шашын күтіледі

Синоптиктер Қазақстанда алдағы үш күн, 22-24 тамызда күн суытып, қатты жауын-шашын түсуі мүмкін деп болжады, деп хабарлады "Қазгидромет" РМК ресми сайтында.

Метеорологтардың мәліметінше, алдағы күндері еліміздің басым бөлігінде құбылмалы ауа райы күтіледі. Республика бойынша қатты жауын-шашын болуы ықтимал.

Қазақстанның батысы, солтүстік-батысы мен солтүстігінде найзағай ойнап, бұршақ жауып, екпінді жел соғады.

Республиканың солтүстік жартысында ауа температурасы күндіз +18...+24 градусқа дейін төмендейді деп күтілуде. Ал Қазақстанның қалған бөлігінде температура фонында айтарлықтай өзгеріс болмайды.

Айта кетейік, синоптиктер Астанада апта бойы жаңбыр жауып, ал Шымкентте аптап ыстық сақталады деп болжады.