Атыраулық жасөспірімге ұшақ бортында темекі шеккені үшін айыппұл салынды

Атыраулық 17 жастағы жасөспірім ұшақ бортында темекі шеккені ата-анасымен бірге әкімшілік жауапқа тартылды. Бұл туралы Polisia.kz ақпараттық медиа-порталы хабарлады.

Медиа-порталдың мәліметінше, Air Astana әуе компаниясының “Атырау – Алматы” бағытындағы әуе рейсі ұшып келгеннен кейін Алматы қаласы әуежайындағы желілік полиция бөлімінің қызметкерлері әуе кемесі командирінің актісі бойынша құқық бұзушыны анықтады.

Басылымның жазуынша, ұшу кезінде әуе кемесінің дәретханасында темекі өнімдерін тұтынған Атырау қаласының 17 жастағы тұрғыны болып шықты.

"Аталған құқық бұзушы заңды өкілдерінің қатысуымен ӘҚБтК-тің 441-бабының 1, 2-бөлігімен әкімшілік жауапқа тартылып, оған 10 АЕК айыппұл түрінде әкімшілік жаза қолданылды. Сондай-ақ, кәмелетке толмаған жәсөспірімнің заңды өкіліне қатысты ҚР ӘҚБтК-нің 127-бабы бойынша әкімшілік іс қозғалып, 10 АЕК мөлшерінде әкімшілік айыппұл салынды", - деді ІІМ өкілдері.