Атырауда мектепте жұмыс істемеген "қызметкерлер" 90 млн теңге жалақы алған

Сыбайлас жемқорлыққа қарсы қызмет Атырау облысындағы мектептердің бірінде жұмыс істемесе де, тұрақты түрде жалақы алып келген 41 қызметкерді анықтады. Бұл туралы "Хабар 24" арнасы хабарлады.

Телеарнаның хабарлауынша, Антикор мұндай заң бұзушылықтарды 12 білім беру мекемесінде анықтаған.

Мектеп директорлары қағаз жүзінде нақты бір қызметкерлерге шағын жөндеу, электр жұмыстары мен компьютерлік сыныптарға қызмет көрсету бойынша міндеттерді тапсырған. Бірақ шынтуайтында барлық жұмысты басқа қызметкерлер атқарған. Бұл ретте директорлардың туыстары, достары мен таныстарының есепшотына 90 миллион теңге түскен.

"Тексеру нәтижесінде мектеп басшысы өзінің туыстарын: қызын, күйеу баласын жұмысқа алғаны анықталды. Бірақ іс жүзінде олар мүлдем жұмыс істемеген. Осы мекеменің өзінде ұрланған сома 20 млн теңгеден асқаны анықталды", - деді Атырау облысы бойынша Сыбайлас жемқорлыққа қарсы қызмет басқармасының басшысы Жәнібек Қаражанов.