Қазақстанда мерзімді әскери қызметке шақырудың күзгі науқаны басталды

Елімізде 1 қыркүйекте азаматтарды мерзімді әскери қызметке шақырудың күзгі науқаны басталды. Бұл туралы Қорғаныс министрлігі ресми сайтында хабарлады.

Президенттің жарлығына сәйкес, бірінші қыркүйектен бастап азаматтарды мерзімді әскери қызметке шақырудың күзгі науқаны басталады. Шақыру науқаны 31 желтоқсанға дейін жалғасады. Жергілікті атқарушы органдардың шақыру пункттерінде 195 қалалық және аудандық шақыру комиссиялары жұмыс істейді.

"Қазіргі шақырудың ерекшелігі ашықтықтың артуында. Демек әскерге шақыру комиссияларының жұмысына сарбаздар аналары мен қоғамдық комитет өкілдері қатысады", - делінген министрлік хабарламасында.

Министрлік мәліметінше, биыл күзде барлығы 19 мыңнан астам адам әскерге алынады.

• Қарулы күштер қатарына 8 мың адам;
• Ұлттық ұланға 6 мың адам;
• ҰҚК Шекара қызметіне 3 мың адам;
• Мемлекеттік күзет қызметіне және Төтенше жағдайлар министрлігіне 300 азамат шақырылады.

"Азаматтарды мерзімді әскери қызметке дайындау және оларды әскерге шақыру – үздіксіз жүргізілетін процесс.

Әскерге шақыру учаскелеріне тіркелген сәттен бастап жергілікті әскери басқару органдары әскерге шақырылуға жататын азаматтарды жүйелі түрде зерделеуді бастайды. Ол үшін әскерге шақырылушының құжаттарын оқып қана қоймай, жас жігіттермен тәжірибе жұмыстары да жүргізіледі", – деп жазады Қорғаныс министрлігі ресми сайтында.

Шақыру науқанының басталуына байланысты барлық өңірде шақыру комиссияларын басқаратын облыс, қала және аудан әкімдері орынбасарларының басшылығымен шақыру іс-шарасы және медициналық комиссия мүшелерімен нұсқау-әдістемелік сабақтар өткізілді.

"Мемлекет басшысының тапсырмасы бойынша қорғаныс ведомствосы мүдделі мемлекеттік органдармен бірлесіп, мерзімді әскери қызметшілердің және олардың отбасы мүшелерінің әлеуметтік әл-ауқатын жақсартуға бағытталған мерзімді әскери қызметтің абыройын өсіру, беделін арттыру жөніндегі жұмысты жолға қойғанын айта кетелік.

Бүгінгі күні мерзімді қызметке алынған сарбаздарға кредиттік каникулдар беру жөніндегі шаралар іске асырылды", - деп жазды Қорғаныс министрлігі хабарламасында.

Министрлікте қарулы күштердің, т.б. әскерлер мен әскери құралымдардың оқу орталықтарында әскери қызметшілерге мемлекеттік үлгідегі куәліктер бере отырып, әскери-есептегі мамандықтарға даярлау жүргізілетінін, олар саласына қарай экономиканың нақты секторында қажет екенін атап өтті.

Қорғаныс министрлігі 70-тен астам жоғары және жоғары оқу орнынан кейінгі білім беру мекемелерімен мерзімді әскери қызмет өткерген азаматтар үшін білім беру секторында қосымша жеңілдіктер беру туралы келісімге қол қойды.

Бұл ретте жоғары оқу орындарында тегін білім алу үшін әскерде қызмет еткен 180-нен аса қазақстандық, ақылы негізде 400-ден астам азамат түскен.

Сондай-ақ министрлікте қазіргі уақытта әскери міндеттілер мен әскерге шақырылушыларды әскери есепке қою және шығару тұрғылықты жері өзгерген кезде автоматты түрде жүзеге асырылатынын айтты.

"Сол сияқты жуырда шақыру учаскелеріне әскерге шақырылушыларды тіркеу туралы куәліктер беру және борышын өтемеген азаматтарға әскери билеттер беру процесі жойылады", - деп жазылған министрліктің ресми сайтындағы хабарламада.