Астанада гипермаркет ішінде 4 жігіт бұзақылық жасап, іс-әрекетін видеоға түсіріп алған
Жарияланған күні:
Астанада төрт жігіт гипермаркет ішінде тығылып, ол жабылғанша күткен. Кейін энергетикалық сусындарды ішіп, тәттілерді жеп, еденге аунап, оны видеоға түсіріп алған. Заңды бұзғандар ұсталды, деп хабарлады Telegram-дағы ІІМ ресми жаңалықтары арнасы.
Ведомство мәліметінше, 13 қыркүйекте TikTok әлеуметтік желісін бақылау барысында төрт жас жігіт “Анвар” гипермаркетінде оның жабылуын күтіп, ішінде видеоконтент жасағаны анықталды.
"Олар іште қалып, мінез-құлық мәдениетіне сәйкес келмейтін әрекеттерге барған. Құқық бұзушылар жеке күзет мекемесінің жедел әрекет ету тобының қызметкерлерімен ұсталып, кейін олар мән-жайды анықтау үшін полицияға тапсырылды", - делінген ІІМ хабарламасында.
Полиция бұзақылар ӘҚБтК-нің 434-бабы бойынша әкімшілік жауапкершілікке тартылып, сот шешімі шыққанға дейін уақытша ұстау изоляторына қамалғанын атап өтті.
Мақаланың түпнұсқасы: https://kaz.nur.kz/society/2036521-astanada-gipermarket-isinde-4-zigit-buzaqylyq-zasap-barlygyn-videoga-tusirip-algan/
