Ерболат Досаев келер жылы Алматыда бірнеше мектеп пайдалануға берілетінін айтты

Алматы әкімі Ерболат Досаев Әуезов ауданының тұрғындарымен кездесті. Жиын барысында қала басшысы 2024 жылдың соңына дейін бірнеше мектеп салынатынын айтты, деп хабарлайды KAZ.NUR.KZ.

Жиындағы көтерілген мәселе - Әуезов ауданынын сапалы әлеуметтік инфрақұрылыммен қамтамасыз ету. Мектеп тапшылығын одан әрі азайту әкімдіктің ерекше бақылауында.

Қала әкімі тұрғындарға алдағы уақытта орындалуы керек жоспарларын бөлісті.

"Жайлы мектеп" ұлттық жобасы аясында бұзылған №97 мектептің орнында 600 орындық жаңа мектептің құрылысы басталды. Құрылысты 2024 жылдың соңына дейін аяқтауды жоспарлап отырмыз.

№72 мектепті бұзып, қуаты 1200 орынға жететін (қуаты 380-ден 1200 орынға дейін ұлғайту) жаңа ғимарат салу үшін осы жылдың соңына дейін 5 жер учаскесін сатып алу, 10 учаскені қосу арқылы мектептің қазіргі аумағын кеңейту жоспарлануда (Проблемалық кредиттер қоры 10 учаскені Мемлекеттік активтер басқармасына берді, 5 учаскені сатып алу аяқталғаннан кейін Жер қатынастары басқармасының желісі бойынша учаскелер 1 мемлекеттік актіге біріктіріледі). Жобалау-сметалық құжаттаманы әзірлеу 2024 жылдың I-ші тоқсанында басталады.

Сондай-ақ 2024 жылдың I-ші тоқсанында "Everest Development" компаниясы №104 мектепке (2-шағын аудан, 59-үй) 400 оқушы орындық қосымша құрылыс салуды бастайды.

2 мектепті бұзып (№13 мектеп-гимназия, 860 орын; №158 мектеп, 620 орын), олардың орнында әрқайсысы 1 200 оқушы орнын құрайтын 2 жаңа мектеп салу (барлығы 2400 орын) мәселесі пысықталуда. Биылғы жылдың соңына дейін жобалау-сметалық құжаттаманы әзірлеуге кірісуді жоспарлап отырмыз.

Талдау қорытындысы бойынша 2 мектеп анықталды, оларға 700 оқушы орындық қосымша құрылыс салуды жоспарлап отырмыз. № 1 мектеп бойынша 400 орындық қосымша құрылыстың жобалау-сметалық құжаттамасы 2024 жылдың I-ші тоқсанында басталып, қазан айында аяқталады. №42 мектеп бойынша 300 орындық қосымша құрылыстың жобалау-сметалық құжаттамасы шілде айында басталды. Мемлекеттік сараптамадан кейін 2024 жылдың мамыр айында аяқталады деп жоспарлануда.

Бұдан басқа "Таугүл-3" шағын ауданында 350 орындық "Zerdesh" жеке меншік мектебін ашу үшін ғимаратты реконструкциялау жұмыстары жүргізілуде. Жұмыстарды қараша айында аяқтау жоспарлануда.

Сондай-ақ №141 және №127 мектептерді сейсмикалық күшейтіп, күрделі жөндеу аяқталды", - деді Досаев.