Есірткі тасымалдады деген күдікпен 61 жастағы шетелдік азамат пойызда ұсталды

Алматы-Ташкент пойызында есірткі контрабандасымен айналысты деген күдікпен ер адам ұсталды. Күдікті Хорватияның 61 жастағы азаматы болып шықты, деп хабарлайды Polisia.kz ақпараттық медиа-порталы.

Көліктегі полиция департаментінің бастығы Бақытжан Малыбаевтың сөзінше, Қазақстанның көлік полицейлері ҰҚК шекара қызметімен бірлесіп, Алматы-Ташкент бағытындағы жолаушылар пойызын патрульдеу кезінде қызметтік-іздестіру иті арқылы күдікке ілінген азаматты анықтады.

Басылым мәліметінше, күдікті Хорватия Республикасының 61 жастағы азаматы болып шықты. Ұсталған азаматқа жеке тінту жүргізу кезінде марихуана және гашиш есірткі заттары табылып, тәркіленді.

"Шетелдік есірткі заттарын сатып алғанын және оны жеке пайдалануы үшін сақтағанын түсіндірді. Аталған факті бойынша шетел азаматына қатысты ҚР Қылмыстық кодексінің 286-бабының 1-бөлігі (Айналыстан алып қойылған заттардың немесе айналысы шектелген заттардың контрабандасы) бойынша сотқа дейінгі тергеп-тексеру басталды", - деді Көліктегі полиция департаментінің бастығы Бақытжан Малыбаев.

Басылымының жазуынша, сот күдіктіге қамауда ұстау түріндегі бұлтартпау шарасына санкция берді.