ҰҚК Қазақстан-Ресей шекарасындағы өткізу пункттеріндегі кептеліс жайлы ақпаратты жоққа шығарды

Әлеуметтік желіде және мессенджерлерде Қазақстан-Ресей шекарасындағы өткізу пункттерінде автокөлік кептелісі орын алғаны туралы ақпарат таралып жатыр. ҰҚК баспасөз қызметінде бұл ақпаратты жоққа шығарды, деп хабарлайды Ұлттық қауіпсіздік комитеті Telegram-дағы ресми арнасында.

Ұлттық қауіпсіздік комитеті баспасөз қызметінің хабарлауынша, әлеуметтік желіде және мессенджерлерде Қазақстан-Ресей шекарасындағы өткізу пункттерінде, соның ішінде Атырау облысындағы "Құрманғазы" өткізу пунктінде автокөлік кептелісі орын алғаны туралы ақпарат таралуда.

Дегенмен Қазақстан-Ресей шекарасының көрсетілген учаскесінде автокөлік құралдарының кептелісі тіркелмеген.

ҰҚК мәліметінше, мемлекеттік шекара арқылы өткізу пункттері штаттық режимде жұмыс істеп жатыр, қандай да бір шектеу шаралары енгізілмеген.

Ұлттық қауіпсіздік комитетінде тек ресми ақпарат көздеріне сенуге және шындыққа жанаспайтын мәліметтерді таратпауға шақырады.

Мәтіннен қате тапсаңыз, бізге жазыңыз