Air Astana Орал қаласына уақытша ұшпайтынын хабарлады

Мәншүк Мәметова атындағы Халықаралық әуежайда жол жөндеу жұмыстарының жүргізілуіне байланысты Air Astana Орал қаласына уақытша ұшпайтынын мәлім етті. Бұл туралы әуе компаниясы Telegram-дағы ресми арнасында хабарлады.

"Оралдағы Мәншүк Мәметова атындағы халықаралық әуежай 8-10 қазан аралығында жөндеуге байланысты жабылады. Сондықтан осы кезеңде әуе компания Орал қаласынан/Орал қаласына рейстерді тоқтатуға мәжбүр.

Жолаушылар алдағы 14 күнге Орал қаласынан/Орал қаласына рейстерге билеттерді қайта брондай алады немесе құнын толық қайтара алады.

Қосымша ақпарат алу үшін билеттерді сатып алу орны бойынша хабарласуларыңызды сұраймыз", - делінген Air Astana әуе компаниясы таратқан хабарламада.

Айта кетейік, бұған дейін Орал әуежайының бспасөз қызметі да халықаралық әуежайдың 8 қазан сағат 02:00-ден 10 қазан сағат 05:00-ге дейін, сондай-ақ 12 қазан сағат 01:30-дан 17:00-ге дейін жол жөндеу жұмыстарына байланысты жабылатынын хабарлаған еді.