Шымкент Мәдениет басқармасының басшысы пара алды деген күдікке ілінді

Шымкент қаласы бойынша Сыбайлас жемқорлыққа қарсы қызмет Шымкент қаласы мәдениет, тілдерді дамыту және мұрағаттар басқармасы басшысының заңсыз әрекетінің жолын кесті. Бұл туралы Антикор Telegram-дағы ресми арнасында хабарлады.

"Ол өзінің қарамағындағыдан еңбек шартын ұзартқаны және қызметтегі жалпы қамқорлығы үшін 1 миллион теңге көлемінде пара алды деп күдіктелуде", - делінген хабарламада.

Антикор мәліметінше, сотқа дейінгі тергеу жалғасуда.

Құзырлы орган Қылмыстық-процестік кодекстің 201-бабына сәйкес өзге ақпарат жария етуге жатпайтынын атап өтті.

"Конституцияның 77 бабы 3-тармағының 1-тармақшасына және Қылмыстық процестік кодекстің 19-бабы 1-бөлігіне сәйкес, адам заңды күшіне енген сот үкімімен қылмыстық құқық бұзушылық жасады деп танылмайынша, ол жасалған қылмысқа кінәлі емес деп есептеледі", - деді Антикордан.

Айта кетейік, бұған дейін Шымкент қалалық мәдениет, тілдерді дамыту және архивтер басқармасының басшысына қатысты тергеу басталғанын Антикордың баспасөз қызметі растаған болатын.