Алматы облысында 16 жастағы қыз үйінің маңынан көптеген пышақ жарақатымен табылды

Желіде Алматы облысында 2007 жылы туған қыз үйінің жанынан көптеген пышақ жарақатымен табылғаны туралы ақпарат пайда болды. Бұл оқиғаға қатысты облыстық полиция департаменті пікір білдірді, деп хабарлайды KAZ.NUR.KZ.

Telegram-дағы EGOV.PRESS арнасының жазуынша, зардап шеккен қыз жансақтау бөліміне жатқызылған. Онда туыстары қызға қан донорлары керек екенін хабарлаған.

Алматы облысы ПД бастығы Бауыржан Әленов Instagram-дағы ресми парақшасында осы факті бойынша ақпарат жариялады.

"Полиция кісі өлтіруге оқталғаны үшін күдіктіні анықтап, ұстады. Тәртіп сақшылары Жамбыл ауданы Ұзынағаш ауылының 23 жастағы тұрғынын анықтап, кәмелетке толмаған қызға пышақпен жарақат келтіргені үшін УҰИ-на қамаққа алды", - деді Бауыржан Әленов.

Облыстық ПД бастығы тергеуде істің жан-жақтылығын және объективтілігін қамтамасыз ету үшін қажетті сараптамалық тексерулер тағайындаумен тергеу іс-шаралары жүргізіліп жатқанынын атап өтті.

Оның айтуынша, аталған факт Қылмыстық кодекстің 24-бабы 3-бөлігі, 99-бабы 2-бөлігі бойынша аудандық полицияда тіркелген.