Келер жылдан бастап кей әлеуметтік жәрдемақының мөлшері артады

2024 жылы 1 қаңтардан бастап Қазақстанда еңбекке қабілеттіліктен айырылу мен асыраушысынан айырылу жағдайы бойынша берілетін әлеуметтік төлемдердің мөлшері артады, деп хабарлады үкіметтің баспасөз қызметі Telegram-дағы ресми арнасында.

Тиісті қаулыға премьер-министр Әлихан Смайылов қол қойды.

"Атап айтқанда, құжатта 2024 жылдың 1 қаңтарынан бастап Мемлекеттік әлеуметтік сақтандыру қорынан еңбекке қабілеттіліктен және асыраушысынан айырылу жағдайлары бойынша тағайындалған әлеуметтік төлемдерді 7 пайызға арттыру көзделген", – делінген хабарламада.

Аталған жәрдемақы еңбекке қабілеттілікті жоғалтқан 87 мыңға жуық адам үшін және асыраушысынан айырылған 59 мың отбасы үшін бағытталған.

Бұл мақсаттарға қосымша 5 млрд теңгеден астам қаражат жұмсалады.

Сондай-ақ министрлер кабинетінің баспасөз қызметі Әлеуметтік кодекске сәйкес, Қазақстан үкіметі еңбекке қабілеттіліктен және асыраушысынан айрылу жағдайы бойынша берілетін төлемдердің мөлшерін жыл сайын арттырып отыратынын еске салды.