Қазақстан мен Қытай арасындағы визасыз режим қалай жұмыс істейді

Қазақстан мен Қытай арасындағы визалық талаптардан өзара босату туралы келісім 10 қарашада күшіне енеді, деп хабарлады Сыртқы істер министрлігі Telegram-дағы ресми жаңалықтар арнасында.

"2023 жылғы 17 мамырда Сиань қаласында (ҚХР) қол қойылған Қазақстан Республикасының үкіметі мен Қытай Халық Республикасының үкіметі арасындағы визалық талаптардан өзара босату туралы келісім 2023 жылғы 10 қарашада күшіне енеді", - делінген хабарламада.

Ведомствоның хабарлауынша, осы келісімнің 1-бабына сәйкес, екі елдің азаматтары жеке істерді, туризмді, ем қабылдауды, халықаралық тасымалдарды, транзиттік, сондай-ақ іскерлік мақсаттарды жүзеге асыру үшін визалық талаптардан босатылады.

Бұл ретте азаматтардың екі мемлекет аумағында болу мерзімі күнтізбелік 30 күннен аспайтын мерзімдегі кезеңге, ал күнтізбелік 180 күн ішінде жиынтығында күнтізбелік 90 күннен аспауы қажет.

Ведомство мәліметіне сүйенсек, азаматтарда 30 күннен артық болу қажеттілігі болған жағдайда олар тиісті санаттағы кіру визасын алдын ала рәсімдеуі қажет.

Сондай-ақ ведомстводан визасыз режим жұмысқа орналасуға, оқуға және миссионерлік қызмет жасауға құқық бермейтінін атап өтті.